<Rosatum et uiolacium>
Rosatum sic facies: Folias rosarum, albo
sublato, lino inseris ut sutilis facias, et uino quam plurimas infundes,
ut septem diebus in uino sint. Post septem dies rosam de uino tollis
et alias sutiles recentes similiter mittis, ut per dies septem in uino
requiescant, et rosam eximis. Similiter et tertio facies et rosam eximis
et uinum colas et, cum ad bibendum uoles uti, addito melle rosatum conficies,
sane custodito ut rosam a rore siccam et optimam mittas. Similiter,
ut supra, et de <uiola> uiolacium facies, et eodem modo melle
temperabis.